Lío de pantalóns
Por Sheila Aldariz
Xan 7E outra vez o Estado enteiro escandalizado. E desta non é pola tan citada crise, nin pola entrevista a Julián Muñoz, nin polo final de “Sin tetas no hay paraíso”. Esta vez é por mor da ministra de Defensa. Xa se sabe, o caso é falar de algo no ascensor, xa que non do tempo, ou da veciña do quinto, pois da Chacón.
E desta vez, a ministra fixo algo moito peor que ser ministra, catalana, ou quedarse embarazada. Desta, saltouse o protocolo e puxo os pantalóns para a celebración da Pascua Militar. E xa se sabe, nun mundo de homes, ¿qué fai unha muller cos pantalóns postos?
Descoñecida é a causa de tal atrevemento que fai que moitos se revolvan nos seus sofás, pero se a ministra fora de vestido largo de Aghata Ruiz de la Prada, alguén falaría igual.
Da moito que pensar que, a estas alturas do século XXI, o tema de noticia nos medios sexa a indumentaria de Carme Chacón e non o seu discurso, no que falou da situación en Afganistán, da loita contra a piratería nas costas de Somalia ou da aprobación dun novo código de conduta militar.
¿Que máis dan todas esas cousas, cando a ministra marca tendencia levando un esmoquin feminino?
